حساسية الأنف والصدر فى الخريف د/ محمد عفيفى

👌حساسية الأنف والصدر فى فصل الخريف للدكتور محمد عفيفى


في فصل الصيف معظم أطفال الحساسية بيقضي وقت طويل بعيد عن الإصابة بنوبات ضيق الشعب الهوائية والأزمات التنفسية وده لأن فرص الإصابة بالأنفلونزا والبردبتقل فيه... ده شئ جميل 👍 لكن اول ما ييجي الخريف ترجع أزمات حساسية الصدر والأنف تزيد وهنتكلم عن أسبابها وازاي نتجنبها

مع بداية العام الدراسي كل سنة بيبدأ الخريف. 👌
مشاعر مختلفة بيمر بيها أطفالنا من خوف وفرح وترقب وأمل ... لكن الأطفال مرضى الحساسية بيعانوا خلال موسم الخريف
في معظم الأحوال 😔

مسببات_ظهور_حساسية_الصدر:

١- الانفلونزا والتهابات الجهاز التنفسي العلوي
يعتبر أكثر الأسباب شيوعًا لظهور أعراض الحساسية بالأخص مع بداية دخول المدارس لأن نسب العدوى بتزيد. مش سهل طبعا الحد من انتشار العدوى بين الأطفال 🙆 لكن ممكن ناخد شوية احتياطات:

• التنبيه على الآباء عدم حضور الأطفال المصابين بالانفلونزا والتهابات الجهاز التنفسي إلى المدرسة لحد ما يخفوا لأن أحيانا طفل مصاب ممكن ينقل العدوى لفصل بحاله.
• غسل الأيدين بانتظام.
• استخدام المناديل الورقية للتخلص من افرازات الأنف وكمان نعلم الطفل يحطها على فمه وهو بيكح 🤧
• تعليم الطفل عدم الاختلاط بالأطفال المصابة بالعدوى... دي كلها تعليمات لازم أن الطفل يعرفها ويمارسها بجدية سواء في المدرسة أو بره المدرسة.
• تطعيم الانفلونزا💉 بيفيد جدا الطفل المصاب بالحساسية وبيقلل من الأزمات التنفسية وتعرضه المستمر لأدوار الأنفلونزا ،،، و يبدأ يتاخد للأطفال فوق سن 6 شهور.

٢- التغير المناخي واختلاف درجات الحرارة
اختلاف درجات الحرارة في الوقت ده من السنة تعتبر عامل مهم لظهور أعراض الحساسية. نحاول نتابع الأرصاد يوميا ونقلل من تواجد الأطفال كتير بره البيت في الوقت ده من السنة👌

٣- مسببات حساسية الخريف البيئية:                      
من أشهر مسببات الحساسية في الوقت ده من السنة عشبة الرجيد Ragweed ونموها بكثرة في الخريف ،،
عشبة الرجيد بتسبب أعراض الحساسية زي الرشح والكحة ابتداءً من منتصف أغسطس ولحد بداية فصل الشتا...
العفن كمان من المسببات البيئية لحساسية الخريف وهى بتزيد مع تساقط أوراق الشجر على الأرض وبتكتر في المناطق الممطرة.

• نخلي الشبابيك والأبواب محكمة الغلق في الوقت ده من السنة مع تشغيل التكييف ولاسيما تفعيل خاصية البلازما لفصل شوائب الجو وتغيير الفلتر بصفة دورية.
• غسل اليدين والوجه والشعر بعد الرجوع من خارج المنزل.
• يجب ايضا الالتزام بالأدوية الوقائية للحساسية بإنتظام.

٤- مسببات الحساسية داخل المنزل:
حشرة الفراش اللي بتكون موجودة على الملايات وفرش السراير والمخدات ودي موجودة في معظم المنازل وتعتبر عامل أساسي لمسببات الحساسية داخل المنزل

طرق_الوقاية_منها
•
• غسل فرش السرير في درجة حرارة أكثر من ٦٠ درجة مئوية أسبوعيًا
إزالة جميع ألعاب الأطفال من سرير الطفل
• في حال تواجد الحيوانات الأليفة في المنزل تمنع من دخول حجرة الطفل
• تنضيف حجرة الطفل بالمكنسة الكهربائية يوميًا مع عدم تواجد الطفل داخل الغرفة وقت التنضيف
• تنضيف الحيوانات الأليفة المتواجدة بالمنزل مرتين أسبوعيًا.                                                                  
كمان من مسببات الحساسية داخل المنزل التعرض للأتربة والروائح النفاذة زي معطر الجو والعطور لأنها تحتوي على حبوب اللقاح التي تزيد فرص ظهور أعراض الحساسية.

 وكمان دخان السجاير أو الشيشة وعشان كده مينفعش التدخين جوه البيت ومينفعش تواجد الأطفال في أي مقهى بيسمح بالتدخين أو بيقدم الشيشة لأن التدخين السلبي طبعا بيزيد فرص حدوث الأزمات التنفسية للأطفال مرضى الحساسية 😡    

مع بداية الخريف لازم نحط خطة للسيطرة على الحساسية واستشارة طبيب الأطفال بخصوص استخدام أدوية وقائية مع بداية العام الدراسي كمان لازم نكون عارفين لو حصلت للطفل أزمة تنفس ازاي نتصرف وازاي نستخدم جلسات البخار أو البخاخات.😊
                                       
كمان عمل اختبار الحساسية عند طبيب الحساسية والمناعة وإعطاء الأمصال المناعية لمعالجة الحساسية من أساسها يعتبر جزء أساسي لعلاج حساسية الصدر والأنف للأطفال وبتتعدى نسبة نجاحها ٧٠٪‏

أخيرًا من واجب الآباء فهم طبيعة مرض الحساسية ومعرفة مسبباته وطرق الوقاية وأهميتها والتعامل مع الأعراض الطارئة عشان يقدر طفل الحساسية يعيش بصورة طبيعية زي غيره وباستخدام أقل أدوية ممكنة

الأمومة والطفل

Www.fashioneleganc3.comWww.fashioneleganc3.com