أمراض المدارس للدكتور أحمد الخطيب طب الأطفال
أمراض المدااااااارس !
دكتووووور ابنى دا أول أسبوع ليه في المدرسه وهمووت م الرعب
-ليه يا ماما كفى الله الشر ؟!
انتا مش سامع عن الحصبة والهربس والجديرى والبرد اللى مخلاش !
ده انا بطلت ازور اعمامه وخالاته عشان عندهم عيال صغيرة وكل اما يروح يتعدى ،، ما بالك بقا بالمدرسه
- طيب تعالى اقولك أشهر أمراض المدارس وازاى تحمى ابنك منها ، والشافى ربنا طبعاً ..
إقرأ أيضا
يلا بينا
- يلا بينا إيه احنا رايحين رحلة اعقلى يا مدام!
تسمعى عن التهاب الحلق والأنف والأذن الڤيروسى و البكتيرى ؟ آه مثلث الرعب ده ؟؟ اهو ده أشهر مرض بييجى للعيال !
وسببه ايه يا دكتور ؟
- النفس يا مدام ،، متخليش ابنك يكحّ ف وش صاحبه ،، ولا صاحبه يكحّ ف وشه ،، ومش لازم "بوس" من الخد المسافة ١٥ سم دى كافية تنقل معظم امراض الجهاز التنفسى بقطرات الماء اللى طالعه مع النفس ،، ناهيكي بقى عن العطس وقفل الشبابيك عشان "البرد" ،، فتلميذ واحد يجيب للفصل كله برد
وايه كمان قول يا دكتوور قلقتنى !
- ثلاثى أضواء المدرسة
انتا هتهزر يا دوكتور مش وقت هزار لو سمحت
- اقصد "الهربس" ، "مرض اليد والقدم والفم HFMD" و "الجديرى" التلاته شبه بعض جداً ، وبييجوا بحرارة عالية جداً ، ورفض أكل فظيييع ،، القرح على الشفه واللثه أو "بُطَش الصديد" المميزة في الحلق للهربس ،، الأكياس "المعبيه مياه" على اليد والقدم ومنطقة الحفاضة لHFMD ،،، التوزيع المميز للجديرى على البطن والظهر والأطراف والانتشار السوبر-سريع خلال ٢٤ ساعه في الجسم كله ،، دى اهم اعراض نفرق بيها مابينهم ،، والعلاج ؟؟؟
واحد .. لوڤير اقراص سريعة الذوبان لمدة ٥ ايام مع خوافض حرارة وبالشفا ان شاء الله ...
يا سلام ،، وكده ابنى يغيب من المدرسه لامتا ان شاء الله
- لغاية ما الحبوب كلها تنشف ، يعنى حوالى ٧-١٤ يوم..
- ...
- ومتنسيش ان ابنك ميشربش من كوباية صاحبه ،، ولا ياكل من ساندويتشاته ،، ولا يستخدم اللانش بوكس بتاعه اللى طلعلنا في البخت كمان
اصل الهربس بينتقل باللعاب مش بالهواااااا
-وايه كماااان ،، قول يا فنااااان
-- فنان !!
وماله ،، اللى جاى بأه "دايرة فاضيه" بتيجى في الشعر وتبقى مليانه قشر وبيهرش فيها جامد ..
- اللهم احفظنا ..! فشر يا دكتور تف من بقك ابنى عمره ما القمل يجيلوا احنا طول عمرنا نضااف
-- اهدى بس يا منا.. قصدى يا مدام ،،
كفاية ابنك يلبس "كاب" صاحبه ،، او يسرح شعره بالمشط بتاعه عشان يتعدى ،، انا عارف ان عيلتكم واخده كاس العالم في النضافه متقلقيش
ده مرض فطرى معدى اسمه Tinea capitis وعلاجه مضاد فطريات بالفم وكريمات موضعيه ..!
-- عاوزه اقولك بأه ان كل ده فشنك وابنى رجعلى سخن جدا جدا ولسانه ابياااااااض وزوره مليان صديد ،، وحوالين "بؤه" باهيييييت خالص ،، ٣ايام لقيت نقط حمرا نطرت في جسمه كله ،، وايده بدأت تقشر على خفيف .. ده ايه يابو العريف
- دى حمى قرمزية Scarlet fever وعلاجها مضادات حيوية قوية ،، ومعدية جداً ٧-١٠ ايام من ظهور البقع الحمرا .. تانى مبتاخديش بالك من النّفَس والهوا والبوس بين الاطفال ده اللي بينقلها
-- انتا كده رعبتنى
والحصبة ؟
-حرارة عالية بتوصل ل ٤٠ ومعاها رشح ، كحة ، احمرار عين ،،، هوب دابل كيك نقط حمرا من فوق لتحت - تنتشر عالجسم كله ..
-- الحمى الوردية Roseola؟؟
- حرارة ٣ ايام تنزل من هنا ،، الطفح الاحمر يظهر من هنا !!
-- في كمان ولا خلاص احسن زهقت منك
في كمان متلازمة الوشّ المضروب بالقلم Slapped cheek syndrome ودى اسم على مسمى ،، وش متعلم عليه احمر كده- زى الكف خماسي الأبعاد اللى بترزعيه للواد لما يجننك،ومعاها نقط حمرا فى الايد والرجل وساعات الجسم كله ،، ممكن تقعد من يومين ل ٤٠ يوم .. تخيلى !!
مننساش "ابو اللكيم" أو "النكاف Mumps" ،،
وده برضه بييجي بانتفاخ او ورم جنب الوش تحت الودان على طووول ومعاه حرارة ووجع اثناء المضغ .. خلى بالك اخر اربع امراض دى كووووووووولها امراض فيروسية يعنى مفيش مضاااااااد حيوى ،، احترسى
-- طبعاً انتا متخيل انى هعرف اشخص الامراض دى لوحدى عشان قعد ترغى معايا بكلمتين
ايوا مانتا قاعد تستعرض معلومات وانا بسمع من غير ما استفيد
- شفتى بأه ظن السوء ده اللى جايبنا لورا !!
عندك الكومنتات فيها صور كووول الأمراض دى بالتفصيل ،، عشان تعرفيها لوحدك ويبقى عندك فكرة قبل ما تروحى للدكتور - وطبعاً لازم دكتووور انتى عاوزه تبهدلى ابنك !!
- طول عمركو يا دكاترة كده سفاحين وواخدين الطب تجارة بالأطفال
-- يعنى لما اقولك لازم اكشف عالطفل عشان اتطمن عليه تجارة بالأطفال ،، وانك تدفعى دم قلبك للمدارس الانترناشونال والناشونال والمالتي ناشونال ده تجارة إنجليش
صباح الفل يا مدام
-صباح الفلّ يا دوك
#تكملة_للبوست .. الناس اللي بتسأل عن الوقاية :
طبعا التنبيه على الاطفال عدم التقبيل ولا استخدام ادوات او اكل الأصدقاء
تهوية الفصول بشكل جيد
البعد عن الاطفال المصابين بالبرد وعزل الاطفال المصابين بامراض معدية مبكراً
الكشف الدورى على الاطفال على الاقل كل ٣ ايام من طبيب المدرسه
اكمال التطعيمات الاساسية ،،
لاحظوا ان الحصبة ، النكاف ، الحصبة الالمانى ،، السعال الديكى ،، كل دى تطعيمات اساسية .
اخذ التطعيمات الاضافية،،
لاحظوا ان تطعيم المكور الرئوى يحمى من بكتيريا تصيب الحلق ايضاً ،،
تطعيم الحديرى المائى لا يعطى في الصحة وهو مهم جداً ،،،
مصل الانفلونزا ضرورى ايضاً ...
برونكوفاكسوم ...
ده اكياس بتدى حماية ضد بكتيريا الجهاز التنفسي كله بداية من الحلق حتى الرئة بنسبة ٤٠-٥٠٪ وبتتاخد كيس يوميا لمدة ١٠ ايام من كل شهر صباحا على الريق مع مياه او عصير ،، لمدة ٣ شهور فقط .
وقبل ده كله مننساش ،الله الشافى
اللهم احفظ اولادنا ولا ترينا فيهم مكروها آمين
تعليقات : 0