تجارب الشباب العاطفية من الجنسين أ/ حسن زايد
سلام عليكم شيخ حسن
عندى ٢٢ سنه بنت لاب وام وعيشه مضطربه الى حد ما ولكن الحمد لله مفيش حد بياخد كل حاجه مشكلتى انى غير متزنه عاطفيا عندى مشكله مش قادره اتعامل مع نفسى ولا اقوم منها انا عندى مرض غريب وهى انى بهوى اوقع اى حد فى غرامى واسيبه بعد ماتاكد
انه فعلا هيحصله ازمه ومش هيقدر يعيش من غيرى ... وطبعا بوهم اللى قدامى بالحب ...المشكله ان ده ممكن يحصل بشكل رسمى او غير رسمى. ..بغلط كتير وبستغفر وبتوب بس برجع والادهى انى شخصيه متزنه جدا واى حد يعرفتى يحلف باخلاقى وعقلى وحسن تصرفى..بوعظ غيرى وانصحه انما مع نفسى بكون زى ماقولتلك ولواحدى بكون كده مبقدرش لسيطر على نفسى ..انا عارفه انها فتنه ومصيبه كبيره...وده كله بسبب تجربه دخلتها وانا صغيره بنت ١٥ تقريبا واحد علقنى بيه وكذب عليا فى كل حاجه قالها وبعدين سابنى ومش كده وبس ده واجهنى بكدبته وبكل حاجه عملها معايا وقالى انه متعمد يوحعنى وعيونه كلها شماته ...من يومها وانا بقيت انسانه وحشه اوى من جوايا وغصب عنى بقيت بعمل كده بعدت عن ربنا دايما بعيده ..تايهه مش عارفه انا عايزه ايه وامى بعيده عنى مليش اخوات ولا اصحاب ولا حد يقف جنبى وينصحنى ..لانى قدام الناس كلها انا مش محتاجه نصيحه ده انا اللى افيد غيرى بخبراتى ...ولكن الله الستار ..بيعحبنى كلامك بحس ان كلامك بيوجع ويطبب ويعالج انا نفسى ربنا يهدينى ويصلح حالى ويتوب عنى ويرزقنى الحلال ويصرف عنى شر نفسى. ..منتظره ردك ولو حضرتك هتنشرها اتمنى حفظ هويتى ..
سلام وعليكم
يُجيب عليه أ/ حسن زايد
الطبيعي واللي انت عارفاه ان الشيطان ملوش شغلانة تانية غير انه يوقعنا في المعاصي
لكن علشان تقعي فمعصية أو ذنب لازم يكون مبرر يعني مش اي ذنب وخلاص هو بيعرض عليكي المعاصي وبيختار الوقت اللي يعرضها عليكي
يعني مستحيل تكوني قاعدة في البيت ويقولك متسرقي الموبايل بتاع فلانة وهي معاها فلوس تجيب غيره وهي بتسيبه كتير ومش هتاخد بالها
لا
لكن ممكن يجيب الخاطر دا على بالك والموبايل متساب ادامك وانت طبعا بترفضيه
ويفضل يعرض المعاصي والذنوب في توقيتات محددة بدقة
وانت بكم المعلومات اللي عندك اما تقبليها او ترفضيها
ودا اللي حصلك بعد علاقة بدأت غلط وبشكل خارج الاطار الشرعي وبسبب تقصير الاسرة والام ربنا يهديهم ويحفظهم لأنهم مدوكيش معلومات تكون درع ليكي يحميكي من حاجة زي كدا
يبقى قلة معلوماتك من ناحية والشطيان من ناحية تانية أقنعك بانك تكملي مع قريبكم دا
وطبعا الشيطان شغال معاه من الناحية التانية في الموقف القذر اللي عمله
بعد ما سابك ووجع قلبك هنا المفروض بيكون في طريقين
طريق تقولي فيه انا ايه اللي أنا عملته فنفسي دا انا ازاي سمحت اني أرخص نفسي كدا وأقلل قيمتي الحمد لله ان ربنا سترني ومترجعيش للأمر دا تاني
وطريق تاني الشيطان مجهزهولك
لا دا مش طريق دي طرق
منها على سبيل المثال واولها انك تعالجي اللي حصل دا بحب جديد يداوي جرح القديم يعني الشيطان عايزك تكوني مستباحة من اي حد وتخرجي من علاقة لعلاقة وطريق من العلاقات ملوش نهاية
هو بيركز على الغاء العقل تماما لأن العقل لما بيتلغي الانسان بيعمل حماقات وحاجات هبلة بيقعد بعدها يقول معقول انا عملت كدا وحصل مني فحق ربنا ثم نفسي كدا ؟
لكن الشيطان عمل منك حاجة تانية خالص لأن واضح ان طموحه معاكي كان كبير واشتغل الالم اللي فقلبك وعرض علكي عرض مغري وهو انك تنتقمي من كل شاب بسبب اللي حصلك و شغلك مساعده معاه تغوي الشباب بحجة انك تنتقمي من كل شاب ممكن يلعب ببنت ومع كل شاب بتكلميه بتتنازلي عن احاسيسك وتتلاعبي بيها وتستعمليها غلط وتمثلي بيها لغاية ما تعتادي التمثيل ويحصل ضمور فأحاسيسك الطبيعية لدرجة انك ممكن تلاقي حد فعلا يستحقها في الحلال ومتعرفيش تخرجيها
الامر معادلة بسيطة
إما إنك تستسيغي الحلال فتنفري من الحرام
أو تستسيغي الحرام فطبيعي هتنفري من الحلال
يبقى انت حاليا عبارة عن آلة انتقام خليتي نفسك مستباحة مع اي شاب مهما كانت وضاعته وحقارته المهم انك تستمعي بتعذيبه ودا مش حاصل لأن غالبا دا بيحور عليكي وفاهم انت بتعملي ايه وبيحاول يمكل بأي وسيلة وبس
أو واحد بيقع زي ما انت وقعتي وممكن يتحول بالتجربة دي لصاحب خبرة يؤذي بنات ناس تانية بسببك يمروا باللي مريتي بيه والشيطان يشغلكم كلكم عنده وهو غالبا دلوقتي مش لاقي حاجة يعملها بسببكم
كله عمال يشتغل كله وكله بيبيع كله وكله بيستبيح كله وكله فقد الثقة فكله
طب ايه الحل ؟
التوبة لله توبة نصوجة التوبة دي مش مجرد توقف عن الحرام دا لا دي لازملها طاعات جديدة او تعاد تنظيمها بحيث يتبني عليها جدول يومك وحياتك
وبعد التوبة لله من الامر دا تعملي بلوكات لكل الحسابات بتاعة الشباب اللي عندك وانا هبعتلك فيديو فيه الكلام عن الموضوع دا باذن الله هينفعك
قلبك مش هيستحمل قسوة أكتر من كدا لأنه دلوقتي ممكن يتعالج لكن لو تحجر والله ما حد هيعاني غيرك
( الشيطان يعدكم الفقر ويأمركم بالفحشاء والله يعدكم مغفرة منه وفضلا واللا واسع عليم )
من دلوقتي يا مفيش الحوار دا تاني ان شاء الله ندرك اللي ندركه من قلبك ونلحقة رققيه بالذكر والدعاء من ربنا التثبيت والبعد عن الحرام
انت مش وحشة انت ضحية زي شباب كتير ربنا يحفظكم
متشغليش بالك بحاجة غير انشغالك بقربك من ربنا
تعليقات : 0