الإعتلال الشبكى عند الأطفال المبتسرين د / إيهاب الإمام
الإعتلال الشبكى عند الأطفال المبتسرين
مرض خطير جداً يؤدي لفقد الابصار للأسف ،، وعلشان كدا لازم الجميع كأطباء وتمريض وأهل يكون عندهم وعي بيه 👌
فيه مفاهيم الاول لازم كلنا نعرفها ...
🔹الطبيعي ان الاطفال بتتولد من ٣٧-٤٢ أسبوع،، لو اتولد قبل كدا بنطلق عليه مبتسر،،
🔹والطبيعي ان الطفل وزنه عند الولاده يكون ٢.٥-٣.٥ كجم،، لو اتولد اقل من ٢.٥ كجم فدا كدا قليل_الوزن
فيه اطفال مبتسرة وقليلة الوزن بيتم حجزهم في الحضانه لأسباب كتير وبيتم تعرضهم للأكسچين لفترة طويلة.
بطبيعة حال الاطفال دي ان وزنهم الضعيف وعدم نضوج الشبكية مع تعرضه للاكسجين لفترة طويلة ،، فدا بيؤدي لإعتلال او انفصال الشبيكه واللي بيكون سبب في فقدان البصر
طب دا معناه اننا لو اطفالنا احتاجوا حجز بالحضانه وكانوا مبتسرين ميتحجزوش ؟
لا طبعا ،، لان كدا مش هيفقدوا بصرهم ،، كدا هيفقدوا حياتهم ،، فمش دا الحل
ركزوا معاية،،👌
#اولاً: مش السبب التعرض للأكسجين ،، لأ،، السبب ان الطفل نازل ضعيف ووزنه قليل والشبكية غير ناضجة ،، فالتأثر بيكون سهل وسريع.. يعني السبب خارج عن ارادتنا
#ثانيا: مش كل طفل مبتسر اتحجز في الحضانه وتعرض للاكسجين يبقي مهدد بإعتلال الشبكية
الفئة المُهددة بالخطر واللي اقرتها الاكاديمية الامريكية لطب وجراحة العيون هي:
*ان الطفل يكون اقل من ٣٢ أسبوع،، يعني اتولد في نهاية السابع او بداية الثامن
*ان وزنه يكون أقل من ٢ كجم وقت الولاده
يعني مش كل طفل اتحجز بالحضانه نقلق عليها
علمياً،، اعتلال الشبكية ٥ مراحل
لو الطفل اتلحق في المرحلة الاولي او التانيه او الثالثه بيكون فيه امل كبير جداً ان دكاترة العيون يقدروا يحافظوا علي النظر
اما في المرحلة الرابعه والخامسه فبتكون الامور صعبة جداً
☝️طب والحل؟؟
اي طفل توافرت فيه الشروط التالية:
*اتولد اقل من ٣٢ أسبوع
*ووزنه اقل من ٢ كجم
*وتم حجزه في الحضانه وتعرض للاكسجين
يجب العرض علي دكتور عيون متخصص في الشبكيه عند سن ٢٨ يوم مش بعد كدا ،،
سواء كان خرج من الحضانه او لسه محجوز فيها،،
ويتم التنبيه والتشديد علي الاهل بالكلام دا من خلال اطباء الحضان والتمريض
طبعاً ،، الموضوع مهم وخطير جداً.. والتوعية بيه ضرورية لان الوقت عامل مهم جداً فيه،، وفقدان البصر شيء مش سهل 😢
وقريباً هيكون فيه بروتوكول كامل بالتعاون مع أطباء الشبكيه بمصر لعمل مسح شامل علي الاطفال اللي هتتوافر فيه الشروط السالف ذكرها.
وربنا يحمي أطفالنا ❤️
د.إيهاب الإمام
تعليقات : 0