نصائح لدكتور الأطفال أحمد الخطيب
المقدمة :
يقدم الدكتور أحمد الخطيب العديد من النصائح الضرورية المهمة جدا للأطفال وكيفية إستنتاج الأعراض المتكررة للطفل .
ويبدأ كلامة ب لأ
لأ
لأ في مليون سبب تانى غير ان لبنك مش بيكفى ، وضع الرضاعة ، أكلك، نوعه ، كميته ، سوايلك ، حالتك النفسية ، والمليون وواحد برضه مالوش علاقة بإن لبنك مش بيكفى والصناعى مش أحسن-إلا ما اضطرتم إليه .
إقرأ أيضا
١٠ علامات تخليكوا تشكّوا إن ده مش برد دي حساسية
10نصائح للشتاء للحفاظ على أطفالنا د/ أحمد الخطيب
حساسية الصدر عند الأطفال د / أحمد الخطيب
إقرأ أيضا
١٠ علامات تخليكوا تشكّوا إن ده مش برد دي حساسية
10نصائح للشتاء للحفاظ على أطفالنا د/ أحمد الخطيب
حساسية الصدر عند الأطفال د / أحمد الخطيب
لأ
ربطة السرّة للمولود مش صحّ ، النوم عالجنب مش مضمون وعالبطن مش صح ،، الرضاعه "الطبيعية" وانتى نايمة مع البيبي Flat عمرها ما تعمل التهاب أذن ، الجلوكوز في الصفرا للوليد مش صح، الجلوكوز أصلاً كبديل للبن مش صحّ ،الصفرا علاجها كله واحد حسب العمر والدرجة وموضوع اللنضة النيون ده برضه مش صحّ..!
لأ
الحرارة مش "رُعب" ولا حاجة ،، والخافض بيشتغل والله مع الحرارة فوق ٣٩ بس بياخد وقت -١/٤ ل ١/٢ -ساعه ،، والحموم بالمياه الفاترة وابنك بيرتعش مش غلط ، والبروفين مش "بيقفل الصدر" الا ف حالات نادرة ، والتشنجات مع الحرارة متعديش مرور الكرام ، لازم كشف دكتور صح الصحّ !
لأ
السخونية مش معناها مضاد حيوى ، والحيل مش بالضرورة التهاب حلق ، وأشهر علامات التهاب الأذن في البيبيهات حوالين ال ٦ شهور الزنّ مع الحرارة العالية ، وابنك اللى بيسخن بشكل متكرر لازم تفكرى فى الحساسية خصوصاً الأنف ، ونقص المناعة ، كذلك حمى البحر الأبيض المتوسط ، ولأ الكونسيبت بتاع شيل اللوز هوا الحل السحرى مش صح ..!
لأ
مش كل ترجيع فلاجيل ،
ومش كل إسهال أنتينال ،
ومش كل حرارة بتنزل بالسيتال ،
ومش أى إمساك دوفالاك ،
الترجيع ممكن يكون تُخمة ،،
والإسهال من المضاد ،،
والحرارة من التسنين ،
والإمساك من قلة المياه ،،
مش صح "الستيريوتايبنج "اللى بنعمله ده والله !
لأ
اللبن والزبادى مش هما الحيطة المايلة اللى نمنعهم ف كل مصيبة !
سخن ؟ امنعى اللبن يااوختشي ..
بيسنن ؟؟ بلاش لبن وزبادى ..
بيرجّع ؟؟ اللبن ممنوع ،، اديله سفن 😭
بيسهل ؟؟ بلاش منتجات ألبان خالص**😊
مقريف ؟؟ وقفى اللبن يا تيته .. يمكن مضايقه😂
بيلعب ومبسوط 😊؟؟ وقفى اللبن يمكن ينبسط أكتر😆
اللبن مش محطة السادات هنقفلها كل شوية 😂
لأ
التطعيمات الإضافية مهمة جداً ، والخافض بيتاخد بعد مش قبل السخونية ، والرضاعه قبل تطعيمات الفم مش بتبوظ التطعيم ، ومش لازم فرق اسبوعين بين تطعيم الصحة(٦،٤،٢) والتطعيمات الإضافية(روتا ومكور) ممكن يتاخدوا ف نفس اليوم او ورا بعض او قبل بعض عادى والله !
لأ
الدكتور ده انسان بيزعل ويغضب ويحزن ويفرح لشفاءك جداً وممكن متخفّش معاه عادى جداً ، وممكن يبقى مشهوووور جداً وميعرفش عندك إيه برضه عادى جداً ،، وممكن يطلب تحاليل عشان الحالة صعبة - حقه جداً ،، وممكن يحول ابنك لدكتور تانى ثقة جداً ،،
وممكن يتشهّر بيه ويتظلم من حد حاقد جداً ،،
بس ربنا مبيضيعش حق أبداً!!
كلمة أخيرة من قلبى والله ❤️
الدكتور مش حاوى ، ولا سوبر مان ، ولا مستر اكس ، ولا بإيده الشفا والله ..
وابنك اللى تعبان وعيان ده الله هوا اللى بيشفيه مش الدكتور ، فتوكل عليه ،،، وخلى الطبيب سبب مش ملاذ ،،
لا أنسى أبداً من سنة كنا بنصلى المغرب في العيادة فقُرَِأت " وإذا مرضتُ فهو يشفين" ،، أب بعد الصلاة لقيتوا بيردد الآيه و بيقول انا متفائل والله ومستبشر بالشفا من الله ،،
أقسم بالله بنته ما كانت بتفصل كحة من رمضان ،،
خفت في ٥ أيام والله بفضل الله !!
ادعى_بيقين..
وإذا_مرضت_فهو_يشفين..
د.أحمد الخطيب ..
** منع اللبن ومنتجاته او التحويل للبن خالي لاكتوز مسموح في حالات الإسهال المستمر ** كبروتوكول تشخيصي-علاجي لحساسية اللاكتوز.
تعليقات : 0