معرفة أسباب السخونة والتعامل معهاعند الأطفال د/ وائل أبو الخير
نصائح بالتفصيل للتخلص من زعر السخونة عند الأطفال
و بدأ موسم ارتفاع درجة الحرارة ..
و بدأ موسم السهر و الخوف و القلق ..
الشتا كان زمان الدفا و الغطا و كوباية الهوت شوكليت و رواية على نور الاباجورة !
دلوقتي بقى كمادات و سوايل دافية و صوت كحة يخترق ودانك و انتي نايمة و يضيع متعة احلى دفا و احلى غطا !
ارتفاع درجة الحرارة "الحاد" والحمى لفترة اقل من اسبوع من أشهر مشاكل طب الأطفال .. و لعله من أهم أدوار طبيب الاطفال على الاطلاق التفريق بين الالتهابات البسيطة "اللى بتحتاج علاج بسيط او حتى مش بتحتاج علاج خالص" و الالتهابات الخطيرة التى قد تحتاج إلى علاج سريع و صارم و ربما الحجز بالمستشفى .. ☹
و الفترة الجايه هتكلم معاكم عن ارتفاع درجة الحرارة عند الاطفال كتير كجزء من حملتنا ضد أمراض الشتاء بس في المقال ده هقولكم على أشهر الغلطات اللي بتحصل مع الموضوع ده ..
1) عدم الكشف على الاذن :
مما يؤدي بدوره لعدم تشخيص التهاب الأذن الوسطى !
التهاب الاذن الوسطى من اشهر اسباب ارتفاع درجة الحرارة عند الاطفال و الكشف بواسطة منظار الأذن على كل طفل مصاب بالحمى ضروري ..عموما اي طفل مصاب بالبرد والرشح والموضوع قلب معاه بارتفاع في درجة الحرارة وبكاء شديد أو عدم تمكن من النوم لازم نشك في التهاب الأذن الوسطى ..
2) عدم وضع في الحسبان الالتهابات الخطيرة :
انا في صفحتى من زمان ضد استخدام المضادات الحيوية عمال على بطال ، و لكن ده مش معناه اني مش باكتب مضادات حيوية ..
لأن في التهابات مفيهاش هزار
اي طبيب اطفال بيدخل عليه طفل سخن لازم يشك في الخمسة دول :
١-الالتهاب السحائي
٢-الالتهاب الرئوي
٣-التهابات الكلى و المسالك البولية
٤-التهاب الغشاء البريتوني
٥-التهاب العظام البكتيري
و غالبا الأطفال المصابين بالالتهابات دي بنحجزهم فورا في المستشفى .. ربنا يبعد الشر عن اولادنا
3) التهاب الجهاز البولي :
للاسف في الاطفال اعراض التهاب الجهاز البولي "أو التهاب في البول زي ما بنقول" بتكون مش واضحة و الاطفال مش بيعرفوا يعبروا عن الموضوع ده خالص.. و اي حرارة في طفل عمره اقل من 3 شهور لازم نشك في الموضوع ده فورا .. و ساعات بيكون في اعراض زي ألم أو حرقان أثناء التبول أو دخول الحمام على فترات قصيرة ، عموما تحليل بول بسيط ممكن يحل مشاكل كبيرة
4) الحمى البسيطة :
Simple fever
Fever without a focus
ده تشخيص موجود عندنا في الطب و الله !
و معظم التهابات الأطفال في الوقت ده بالذات من السنة بتكون كده .
دكاترة كتير للاسف بتتكسف تقول للاب و الام الولد سخن بس انا مش شايف حاجة .. و طالما حالته العامة كويسة هنراقب الأعراض و هنشوف، و يريح دماغه و يقول للأم الولد عنده التهاب في الحلق "مع أنه نادر الحدوث تحت سن السنتين" و يرزع مضاد حيوي و خلاص !
لو ابنك بياكل كويس و يضحك و يلعب و هو مش سخن غالبا مش محتاج مضاد حيوي خصوصا لو معندوش اي اعراض اخرى !
ارتفاع درجة الحرارة يا اخوانا بناخد له خافض حرارة مش مضاد حيوي !
5) التركيزات المختلفة لأدوية الحرارة :
دي نقطة مهمة ..
تركيز الباراسيتامول في دوا زي الستال مثلا بيختلف في النقط عن الشراب عن اللبوس، و تركيزه بيفرق بين السيتال و التمبرا و البنادول ..
فـ متديش جرعة دوا الحرارة من نفسك الا لما ترجعي لطبيبك أو الصيدلي
و احذري من زيادة جرعة الأدوية المضادة للحرارة .. لانهم دوا زي اي دوا له اثار جانبية و سمية.. مش بونبوني يعني !
6) ممنوع التلج .. ممنوع الكحول .. ممنوع الخل :
الكمادات بتتعمل بمياه فاترة و بس و نشجع الأطفال يشربوا سوايل كتير
التلج لا .. الكحول لا .. الخل لأ !
د.وائل أبو الخير
تعليقات : 0