40 نصيحة لكل أم مهتمة بطفلها د/إيهاب الإمام طب الأطفال
40_نصيــحة_هامة
لمـامـي_المهتمــــة
=================
١- لازم تتعبي في اول فترة في حياة البيبي (الامومه مش سهلة بس مستهلة) 👍
٢- علاج الصفرا الفسيولوجيه (بتظهر من ثالث يوم) رضاعه ومتابعه اه والله وبس
٣- قطرة العين وكحول السره وحقنة فيتامين ك من اول يوم ...اوعي تنسي👌
٤ـ الخنفره حلها محلول ملح وقبل الرضاعه ....مفيش منها ضرر
٥- الانتفاخات هتزيد وتقل في اول ٤ شهور ...حافظي علي اكلك من الدهون والمسبك والشاى والقهوه والشيكولاته ..ونظمي الرضاعه ....وادي سايميثكون او اخواته
٦- بلاش اعشاب في اول فتره...الطفل بيشبع ومقدرته علي الرضاعه بتقل ..اه والله🙏
٧- الكريمات اللي فيها زنك وبانثنول كويسه جدا للوقايه من التسلخات ...اوعي تنسي تهوي الطفل
٨- بلاش مناديل مبلله افضل😡
إقرأ أيضا
٩-الفطريات اللي بالفم شيء وارد حدوثة وعلاجها قطارة نيستاتين كل ٦ ساعات او دكتارين جيل للفم بس قللي الكمية وانتي بتستعمليه
١٠- لبن الام موجود من اول يوم بس بيزيد من اليوم التالت من بعد الولاده ....اصبري واشربي سوايل وحلبه وبلح وجرجير وشمر وسكريات هتساعدك في زيادة اللبن
واوعي تكسلي لبن (السرسوب) ليه فوايد عظيمه للطفل ولازم ياخده❤️
١١- وزن الطفل بيقل في اول اسبوعين ١٥٪ من وزنه ،، اوعي حد يضحك عليكي ويقولك لبنك مش كفايه
١٢- بلاش لبن صناعي من الاول ارجووووكي🚫.... ليه شروطه فبلاش نبدأ بيه...مفيش افضل من لبن الام ....اصبري ع الواد يا حماتي
١٣- التيتينه (( السكاته)) بترهق فك الطفل وبتساعد في زيادة الانتفاخ ...قلتها احسن
١٤- شور الطفل وتهوية المكان اللي نايم فيه جزء من راحته
١٥- الطفل مش بيعيط علشان جعان بس ..فيه اسباب كتيييييير اوي للبكا..استبعديها الاول😇
١٦- الترجيع في الاول شيء طبيعي يا زياده في الرضاعه يا اما ارتجاع فسيولوجي....دورنا نتابع الوزن لو بيزيد يبقي احنا تمام
إقرأ أيضا
١٧- بلاش مسكنات للطفل قبل التطعيمات ...(بطلناها) 😁
١٨- لو ام بتشفط ممكن تسيب اللبن ف الثلاجة ٣ ايام والفريزر ٣ شهور وقبل ما نرضعه للطفل بنحطه في مياه دافيه (مش ع النار مباشرة) واللي يفضل من اللي اتسخن مينفعش يتخزن تاني...
١٩- لو البيبي نزل صدره (مكان الحلمه ) كبير اوعي تسمعي كلام ستو وتعصري😏....دا اضطراب هرموني بيحصل بعد الولاده وبيروح لوحدددده .....اوعي تعصري
٢٠-فيتامين د من اول يوم...دا الكلام الجديد اوعي تنسي ٤ نقط مره يوميا لسن سنه
٢١- الطفل المبتسر ليه لبن معين وفيتامين د وحديد .تابعي مع دكتور افضل😎
٢٢- الرضاعه في زاوية ٤٥ للطفل ....وزاوية ٩٠ للام في الاول لحد ما تاخدوا علي بعض...التكريع مهم جدااا
٢٣-بلاش لبن صناعي (تاااني) ....بقي موضه ومش كل طفل بيبكي يبقي جعان ونرزعه صناعي 😢
٢٤ـبلاش لبوس جليسرين عمال علي بطال...اظبطي اكلك واعملي للبيبي مساج واللبوس لو عدي ٣ ايام بدون حمام
إقرأ أيضا
٢٥- الفتق السري ...علاجة ولا حاجه ...بيتحسن لوحده مع الوقت
٢٦- الفتق الاربي...جراحه وش😔
٢٧- شرب المياه لما نبدا اكل....ربنا خلق في لبن الام مايكفي الطفل من المياه .....مش عطشان ولاحاجه
٢٨- بلاش كحل مجهول المصدر 📢....الرصاص ممكن يضيع العين وشفناها كتير للاسف
٢٩- متابعة الوزن مطلوبة...اول ٤ شهور ٧٥٠ جم لكل شهر
تاني ٤ شهور ٥٠٠ جم لكل شهر
تالت ٤ شهور ٢٥٠ جم لكل شهر
٣٠- اللسان المربوط (مختلف عليه) بس لو اتعمل بدري احسن للام والطفل...لا الطفل هيشرق ولا الام هيجيلها الم في الحلمات مع الرضاعه
٣١- الطهاره اول اسبوع او علي الاربعين
٣٢-علاج التهاب الحلمات مش كريمات ومراهم بس حضرتك دا لازم تصحيح لوضعية الرضاعه كمان
٣٣-وضعية الطفل بتأثر علي كمية اللبن في صدر الام ...تخيلي...استشيري اخصائي رضاعة طبيعية
٣٤-المسكن وخافض الحراره الوحيييد للطفل قبل ٦ شهور ...الباراسيتامول بس
٣٥-((لبني خفيف يادوك))... 😱بجد !! وزنتيه فين حضرتك ؟؟؟ هي مراره واحده بس ياجودعان....جمل لازم تنقرض
٣٦-بلاش بوس البيبي من الفم ارجوكي...الحب مش مقطع بعضه يعني
٣٧-التطعيمات الاختياريه عندنا ..اجباريه في العالم كله ..حاولوا تطعموهم لانهم بجد مهمين جدا👌
٣٨-لازم تعرفي يعني ايه حساسية البان في اول سنه ...وارد حدوثها ولازم ناخد بالنا
٣٩-لبن الام جزئين..اول الرضعه وآخر الرضعه...لازم الطفل يوصل للبن نهاية الرضعه لانه المفيد لزيادة الوزن وراحة المعده
٤٠- الثقافة الطبيه فرض عين علي كل أب وأم ....أطفالنا اهم حاجه في حياتنا 👫
د.إيهــاب الإمــــام
رسالة ورؤية موقع الصحة والجمال والأزياء
الصحة والجمال والأزياء يحتوى على كثير من المقالات والدروس في عدة مجالات كالعمل الحر والربح من الانترنت والمجالات التعليمية والصحية والرياضية وكذلك مجال شروحات البرمجة والكثير من التصنيفات المختلفة والتي تُغني من يريد انشاء موقع نموذجى رائد عن طرح الاستفسارات والاسئلة التي تتعلق بعالم الإنترنت.
كما يتميزالصحة والجمال والأزياء أن له فريقً مهمته هي مراجعة كل المقالات المطروحة عليه ولا يتم نشر أي مقال في حالة كان مكررًا أو عديم الفائدة؛ لذلك أي مقال سوف تجده على موقع بوابات كوم سيقدم لك معلومات هامة كتبها مطورون بارعون في أعمالهم، وراجعها ورائهم فريقًا مميزا متخصصا.
تعليقات : 0