علاج حساسية الصدر عند الأطفال د/إيهاب الإمام
اتكلمنا في مقالة رقم ١ عن تعريف الحساسية وامتي نشخصها..
واتكلمنا في مقالة رقم ٢ عن أهم مثيرات الحساسية ..
هنا بقا هنتكلم عن علاج الحساسية ،،
ودا مرحلتين
وقت_الأزمه
الوقاية
🚩ولما نقول علاج لحساسيه صدر فدا علاج بصفة مستمره الغرض منه ان الطفل يقدر يتعايش كويس وينام كويس ويصحي كويس ويقدر يقوم بتشاطه اليومي ..بالظبط زي اللي نظره ضعيف ولابس نظاره نظر ميقدرش يمشي من غيرها 🤓
🚩العلاج الاساسي للطفل بيكون عن طريق #الاستنشاق ( موسعات شعب-كورتيزون )سواء عن طريق البخاخات او أجهزة البخار (النبيولايزر) وبيحكمنا في النقطه دي سن الطفل
*فلو اقل من ٦ شهور ⬅️ نبيولايزر Nebulizer
*اكتر من ٦ شهور ⬅️ نبيولايزر او بخاخات عن طريق الجهاز القمعي Aerochamber
*بعد كده ⬅️ نقدر نستخدم البخاخات مباشرة.. وفي السن الكبير ( اكتر من ٤ سنوات) فيه ادوات متاحه عن طريق الشفط زي Diskus
يهمنا جداً الطريقه اللي بنوصل بيها العلاج للطفل لضمان وصوله بصوره جيده،، موضوع بقا هياخد علي البخاخه وهيتعود عليها فانا مش هعلق عليه بصراحه لان وعي الامهات زاد جدا جدا وبقا بيقابلنا قليل 👏 so proud
🚩البخاخات اللي بتحتوي علي موسعات شعب وعلاج جلسات البخار
*اتروفنت ودا مسموح من سن يوم
*سالبيوتامول زي نقط فاركولين وبخاخة فنتال او فنتولين ودا مسموح بعد ٦ شهور ،، لكن قبل ٦ شهور بيكون تحت متابعة الطبيب
*امبولات الكمبوڤنت ،، الاتنين مع بعض (فاركولين +أتروڤنت)
🚩البخاخات وامبولات الجلسات اللي فيها كورتيزون
بالميكورت ،، ودا منه الاتنين
فليكسوتيد والفيسكو ودا بخاخات
🚩فيه نوع من البخاخات موجود فيه النوعين مع بعض (موسع الشعب طويل المغعول والكورتيزون) زي سيرتيد وسيمبيكورت
☝️️ابنك جاله الازمه
ع حسب سنه ..جلسة أتروڤنت او فاركولين (نقطة لكل كجم ) وتكرر علي حسب حالة الطفل من الطبيب
وجلسات الكورتيزون بتكون علي حسب ،، ليه بنقول علي حسب لان الطبيب من خلال الاعراض بيقدر يحدد مرحلة الحساسية staging ودي بتكون تبعاً ل
الطفل جاله ازمه كام مره ؟؟ وبيخف في خلال فتره اد ايه ؟؟ وهل بتأثر علي نشاطه اليومي ولا لا؟؟
ومن خلال الملاحظات دي بيحدد اسلوب العلاج والوقايه
☝️️طيب ،، هو لازم كورتيزون يادوك؟؟
الكورتيزون الاستنشاقي ملوش اي آثار جانبيه بل بالعكس بيقلل من التهاب الشعب وبيقلل من حساسية الشعب الزيادة للمثيرات bronchial hyper-responsiveness وكمان بيقلل من افراز المخاط وكمان بيساعد علي زيادة عمل موسع الشعب،، وعلشان كدا المنظمات المنوبه بعلاج الحساسية علي مستوي العالم بتنصح بيه بصفة مستمره ICS طول مافيه حساسية
تخيلي بقا كل الفوايد دي مقابل فوبيا من كلمة ( كورتيزون) ،، #الكورتيزون_مش_بعبع
#نروح_للعلاج_الوقائي
١- نبعد كل مثيرات الحساسية اللي ذكرتها في بوست رقم ٢
٢-لو فيه حساسية أنف لازم نعالجها
*رشح اكتر من ١٠ ايام
*خنفره وانغلاق انفي اكتر من ١٠ ايام
*رشح وعطس بصفه مستمره
كدا #حساسية_أنف
ولو مااتعالجش منها بتزود الافرازات الخلفيه من الانف وكله نازل ع الشعب الهوائيه مع دور برد بسيط الصدر يقفل وشكراً
فلاااازم نعالجها كويس ،، ازاي؟؟
البعد عن المثيرات ،، بلاش سجاير في البيت ،، بلاش تعرض لهوا بارد ،، بلاش التراب والدخان والمطبخ اللي من غير شفاط وموصل للبيت كله ،، بلاش ملايات وكوفرات فيها (وبر) خلينا في الميكروچيل او الفيبر ،، ونبدأ مع الطفل فوراً ب كورتيزون استنشاقي زي نازونكس وآڤاميس بتزيد وتنقص تبعاً لحالة الطفل ،، مع مضاد للحساسية من الجيل الثاني زي تيلفاست او زيرتك،، ولو طلع الطفل عنده لحمية مع وجود الحساسية استئصالها بيفرق كتييير جداً في التحسن
٣-مونتليكاست زي
سينجيولاير-ليليبل-كاست-مونتيكال
واشكال كتير في السوق
المهم ان الاكياس منه بتتحط علي زبادي او بطاطس مهروسه او چيلي او سيرلاك
المهم اي حاجه ذات كتله والافضل بالليل ومسموح من سن ٦ شهور ،، والاقراص منه مضغ
•تركيز ٤ مجم من ٦شهور لخمس سنوات
•تركيز ٥ مجم فوق خمس سنوات
•تركيز ١٠ مجم فوق ال ١٠ سنين
ملوووش كورس معين ..طول ما الطفل كويس بياخده كوقاية
٤-بخاخة الكورتيزون زي فليكسوتايد
او جلسة كورتيزون (بالميكورت)
كل يوم الصبح ICS
ودا اقل درجات علاج الحساسية كوقايه
النصيحة الوحيده اللي بنقولها مع الاطفال او الكبار اللي بيستخدموا بخاخات الكورتيزون ،، انهم لازم يتمضمضوا بميا بعد استخدامها وميبلعش الميا دي ..لان استخدام البخاخه بصفه مستمره بتعمل فطريات بالفم
بعض الاطفال بيحتاجوا موسع شعب كوقاية،، ناخد بالنا من النقطه دي 👌🏻
بخاخات الفاركولين و الفنتولين او الجلسات
متنفعش كوقااايه ،، ليه؟؟
لو استخدمناها فتره طويله بتعمل tachyphylaxis بمعني ان كل فتره بنحتاج نزود الجرعه علشان نحصل علي فاعليه زي الاول
طب والحل ؟
بنخليها ديما لما يكون الطفل تعبان كخط دفاع اول مايبدأ يكح او لو عارفه ان ابنك لما بيعلب او بيجري بيبدأ يكح فبياخدها قبل اللعب او الجري فقط ودا نوع من انواع الحساسيه اسمه
Exercise induced asthma
طيب لو الطفل محتاج موسع شعب كوقايه
بننقل لأتروفنت
او لموسعات الشعب طويلة المفعول دي سيرتيد او سيمبيكورت واللي اتعملت مخصوص للفترات الوقائية بس من سن ٤ سنين فقط 👍
🚩يادكتور يعني هنفضل في العلاج علي طول 😔
حضرتك قولت ان كل دا مجرد مسكنات للطفل علشان يقدر يعيش حياته بطريقة طبيعية من غير مايصحي بالليل من كتر الكحه ويقدر يمارس نشاطه اليومي ،، مفيش حل جذري ؟؟
-اولاً
نقول الحمد لله
أطفال الحساسية بيستجيبوا للعلاج وبيخفوا،، لكن فيه اطفال بتعاني من امراض مصحوبه بكحه مش بتخف اساسا زي التليف الكيسي وتمدد القصيبات 😢
-ثانياً
نسبة شفاء حساسية الصدر
علي ٦سنوات بتوصل لـ ٧٠ ٪ من الاطفال
علي ١٠ سنوات بتوصل لـ ٢٠٪ من الأطفال
وفيه ١٠ ٪ بتكمل معاهم
بس فيه اطفال بتجيلهم وهم كبار adult asthma onset 😔
-ثالثاً
الطفل اللي الكحه معاه طول الوقت وغير مستجيب علي العلاج تماماً،، دا بنعتبره uncontrolled
فبنلجئ لدكتور حساسية ومناعة بيشتغل بالأمصال ودا علاج ناجح بنسبة بتوصل ل ٨٠٪
بيعمل للطفل اختبار للجلد او بالدم وبيعرف الطفل متحسس من مثيرات ايه بالظبط
وبيبدأ يمنعه منه تماما ويديله المثيرات اللي الطفل طلع متحسس منها بطريقة مخففه جدا وتدريجياً عن طريق المصل ،،الموضوع دا بياخد علي الاقل ٦ شهور ،،
وفيه اساتذه كتير في المجال دا في مصر🇪🇬
ربنا يشفي أولادنا ❤️
-حساسية_الصدر
-مقالة رقم_٣
د.إيهاب الامام
01066231662
تعليقات : 0