أكلة الفسيخ وأضراره د/ شريف حماد
في ناس كتير بتحب الفسيخ
و في ناس كتير بتقرف حتي من ريحته
مش دي المشكله خالص
-المشكله ان في بكتيريا اسمها Clostridiu_ Botulinium# البكتيريا دي بتعزل نفسها جوه حويصلات علشان تحتمي من الحرارة و الظروف البيئية و بتقدر تتكاثر في ظروف غياب الأكسجين زي حالات الأطعمة المعلبة أو الأغذية المخزنة بطريقة سيئة "زي الفسيخ" و بتفرز ساعتها المادة السمية اللي اسمها "بوتيولين" و دي بتُعتبر من أقوي السموم المعروفة
-طيب ايه هي الأعراض اللي بتحصل مع تسمم الفسيخ؟؟؟
1- لازم نعرف في الأول ان التعب ما بيحصلش علي طول، بياخد وقت من 12 ساعه لحد 36 ساعه
2- أول أعراض ممكن تحصل بتبقي أعراض زي النزله المعويه "غثيان .. قيء .. ألم في البطن .. و امساك "مش اسهال"
3- بعد كده بتحصل أعراض تانيه زي "صعوبة البلع .. صعوبة الكلام .. الدوار .. الزغللة .. ازدواج الرؤية"
4- بتحصل أعراض ضعف في العضلات و الشلل و بتبدأ بإرتخاء الجفن و فقدان تعابير الوجه و شلل في عضلات الكتف و الذراعين و بعد كده كل عضلات الجسم بتضعف لحد ما بتوصل لعضلات التنفس و دي بقي بتبقي أخطر حاجه لأن التنفس بيقف و المريض لو ما اتلحقش بيموت
5- المريض بيفضل واعي لحد الآخر و ده شيء صعب لأنه ما بيقدرش ينقذ نفسه
-إيه الإسعافات الأولية اللي نقدر نعملها ؟؟؟
-للأسف في البيت ما بنقدرش نعمل أي حاجه غير اننا نجري بالمريض لأقرب مركز سموم
لازم المريض يتحط علي جهاز تنفس صناعي علشان عضلات التنفس بيحصل فيها شلل بعد كده لازم المريض ياخد المصل في أسرع وقت و للأسف المصل ده غالي جدا و مش متوفر حتي في الصيدليات و وزارة الصحة بس اللي بتقدر توفره
أخيرا ... واضح من الكلام ان #تسمم_الفسيخ من أخطر #حالات_التسمم اللي ممكن تحصل و علشان كده اننا نحمي نفسنا أهم كتير من العلاج و ده اننا ما ناكلش الفسيخ أو علي الأقل نبقي واثقين من المصدر اللي جايبين منه
تاني حاجه اننا نقتل #البكتيريا دي و الحاجه الوحيده اللي تقتلها هو اننا نعرض الأكل لدرجة حراره أعلي من 85
ربنا يسلمنا من كل سوء
إوعوا تاكلوا فسيخ بقي عشان بيعمل تسمم
مدرس مساعد السموم الإكلينيكية
#كلية_ الطب - جامعة حلوان - مصر
مع تحيات فريق عمل موقعكم الصحة والجمال والأزياء
تعليقات : 0