نظام غذائى لتجنب هيجان القولون للدكتور عبدالله ربيع دكتور الجهاز الهضمى
المقدمة:
كثيراً من مرضى القولون ينزعج لمنعه من بعض الأكلات وكثيراً ما نجد بعض الإهمال فى نصائح الطبيب المتخصص بأمراض القولون
اليوم يرشدنا الدكتور الفاضل عبدالله ربيع دكتور الجهاز الهضمى على طريقة الغذاء السليمة الصحية التى تُجنب مريض القولون وخاصة القولون العصبى من متاعب كثيرة بشرط الإلتزام بتعليمات الطبيب
اختيارات الإفطار:
- العيش يفضل الاسمر البلدى.
- الفول بدون زيت او بزيت زيتون وقليل الملح وحط بهارات عادي.
- بيض مسلوق مش مقلي.
- جبنه قريش او بيضا خفيفه الدسم اهم حاجة متكونش حادقة.
- بطاطس مهروسة بس مش مقلية وقليلة السمنة.
- عسل ابيض بلاش الاسود.
- زبادى خفيف ويفضل لايت.
- شاى خفيف او شاي بلبن خالي الدسم.
اختيارات الغداء:
- الارز والمكرونه او النشويات عموما عادي بس بصلصة خفيفة.
- السلطة مع تقليل الفجل والجرجير، والخيار يكون متقشر.
- طبيخ الخضروات عادي بس قليل التسبيك مش ني ف ني (الكوسه .السبانخ.البطاطس.الفاصوليا الخضراء.الباميه).
- اللحوم والاسماك والفراخ يفضل تكون مشوية وممكن محمرة بس بزيت ذرة خفيف مانخليهاش تشرب زيت ونشيل الجلد والدهون.
اختيارات العشاء:
تقريبا زى الافطار ومسموح:
- البسكويت" السادة " و"الكيك" قليل السكر والسمن.
- "الجيلي" و"الآيس كريم" السادة و"الكاسترد" والمهلبية والأرز بالحليب والبليلة باللبن.
- الفواكه المسموح منها مساءا:
البطيخ .التفاح.الموز.الكنتلوب.العنب.الخوخ.الرمان.
بلاش الحاجات دي اثناء #هياج_القولون:
( لأن القولون، أسلوب حياة .. لزما تكون دي طريقتنا كلنا الصحية في الأكل ).
خد وقت ف المضغ / بلاش ميا او مشروبات غازية اثناء الاكل/ دايما طبق سلطة مع وجبة الغدا او خضروات عموما/ بلاش شاي وقهوة ونسكافية وتدخين وكولا كتير/ بلاش تسبيكة كتير ف اكلك/ بلاش طبق مخلل جمب كل اكلة/ دخول الحمام صباحا حتي لو مفيش رغبة عشان تعود القولون انه ينظم الاخراج/ اعمل تحليل براز عشان لو فيه ديدان او طفيليات زي الاميبا او الجيارديا او الدوسنتاريا او جرثومة معدة ف البراز يتعالج سبب الامساك والقولون العصبي/ اكبر كمية مياه ممكنة بين الوجبات منه تخسيس وصحة عامة ومنه علاج قولون/ بلاش شاي وفاكهة بعد الاكل مباشرة/ قلل م اللبن الدسم والبرتقال/ بلاش حلويات بزيادة وشيكولاته ولب كتير.
الثوم والبصل سبب كل بلاوي القولون!
بعض #الأعشاب والمشروبات صديقة الجهاز الهضمي:
١-الكمون:
(معلقة صغيرة من الكمون وبعدها مباشرة كوب ماء او معلقة كمون علي كوب ماء ويغلي و يشرب دافئ).
٢-الينسون الدافيء.
٣-حبة البركة او الحبهان:
(تبلع بالماء اكنها برشامة).
٤-الحلبة المغلية.
٥-الكزبرة:
(معلقتين من الكزبرة الجافة على كوب ماء).
٦-الزنجبيل:
(لو قدرت تستحمل طعمه، سحر).
٧-اللبن الرايب السادة.
٨-الكراوية اوالينسون اوالنعناع.
مع بعض التنبيهات المنزلية الهامة اثناء نوبات المغص بالذات الليلية:
١- طفي النور واقفل موبايلك واسترخ إلي أن تشعر بتحسن.
٢- كمادات ساخنة علي مكان الألم.
٣- مفيش أكل حتي لو جعان لغاية ما تروق.
٤- سوايل كتير زي المشروبات اللي فوق بس ببطء.
٥- بلاش البان او مشتقاتها عدا الرايب السادة.
واخيرا الحياة قصيرة ومش مستاهله كل التوتر والمشاكل عشان قولونك وصحتك العامة.
موضوع مهم ورائع
ردحذف