5 أمراض تخص الأطفال إسهال رشح جديرى حرارة عالية دكتور إيهاب الإمام

• مارس 19, 2018
• الأمومة والطفل، الصحه
• ًAhmed Khalifa

المقدمة:  

يوضح لنا الدكتور إيهاب الإمام أهم خمسة أمراض التى يتعرض لها الأطفال بكثرة حيث يقوم بتوعية كبيرة لأهمية المعرفة بهذه الأمراض تحت عنوان  5 أمراض تخص الأطفال إسهال رشح جديرى حرارة عالية دكتور إيهاب الإمام 
 اسهال،،كحه،، رشح،، جديري،، حرارة عالية

إقرأ أيضاً

سنة أولى أكل للطفل د/إيها الإمام &د/محمد عفيفى

نقص انزيم اللاكتاز و أعراضه د / إيهاب الإمام طب الأطفال

آلام السيقان عند الأطفال

علاج الصرع عند الأطفال وكيفية إكتشافه

أدوية قاتلة للأطفال أحذروها

١- حالات الإسهال والترجيع
•••••••••••••••••••
🚩 زياده الفتره دي بسبب تغيير الجو والروتا موجود علي استحياء (فيروسي)  ،،أهم حاجه محلول الجفاف والتعويض بالسوايل لان الاسهال بياخد وقت

🚩لو حصل تسلخات مع الإسهال فدا نتيجة نقص الزنك ،، فبنعوضه بشراب سلفوزنك لمدة ١٠ ايام وبندهن كريم يحتوي علي زنك مكان التسلخات زي زنك اوليف ونقلل استخدام المياه مع التسلخات.. يدوب بعد الحمام مع التهوية

🚩لو حصل ترجيع ،، نهدي كده ع المعده gut rest
حوالي ٤ساعات ولما نأكل يكون مسلوق بس ولو استمر ١سم زوفران او زوفاترون او دانست لكل ١٠ كجم من وزن الطفل

🚩لو استمر الترجيع والاسهال زيادة والطفل رافض محلول الجفاف يبقي لازم نعلق محاليل في المستشفي

🚩لكن لو نشاط الطفل كويس حتي لو بيسهل سيبيه ف حاله الله يكرمك🙏🏻

٢- الالتهاب الشُعيبي وحساسية الصدر
•••••••••••••••••••••••••••••••••••
🚩بنشوفه حالياً بسبب فصل الربيع .. بيجي الطفل بكحة غليظه مع بداية نهجة خفيف وتزييق ع الصدر

🚩اهم حاجه السوايل اللي بتساعد علي إذابة المخاط good hydration

🚩رضاعة كل ساعتين وبلاش تتينه الله يخليكم لانها بترهق الطفل أكتر

🚩جلسات النبيولايزر بموسعات الشعب هي الحل الأمثل في الحالات دي ..طبعا بعد الكشف

🚩بلاش أدوية كحة..لان الكحة في الوقت دا هي اللي بتساعد في خروج البلغم من صدره ك reflex
ولو رجع بعد الكحه دا شيء طبيعي مش محتاج مضادات للقئ ،، والكحه أخر حاجه بتنتهي في الدور دا

🚩متابعة الطفل من خلال الدكتور شيء ضروري لضمان التحسن فمفيش حد يكسل

🚩 الالتزام بالعلاج الوقائي بالنسبة لحساسية الصدر من بخاخات وسينجيولير مع النصائح اللي ف البند اللي جاي 👇

٣- حساسية الأنف والجلد والعين ( أمراض الربيع)
•••••••••••••••••••••••••••••••••••••••••••
🚩 أمراض الربيع بتظهر في شكل حساسية في أماكن متعددة زي حساسية الأنف وحساسية العين في صورة رمد ربيعي وحساسية الصدر  أو حساسية الجلد في صورة اكزيما ،، الحساسية بتكون بسبب رد فعل الجهاز المناعي الطبيعي تجاه حبوب اللقاح المتطايرة من الزهور أثناء تفتحها ، أو بسبب إنتشار الأتربة والرياح في اشهر الربيع التي تصيب الجسم عن طريق فتحة الأنف أو الفم أو العين أو الجلد

🚩اي طفل في اي سن بيعاني من رشح مستمر او عطس أوفر او حكة بالأنف اكتر من أسبوع
فدا حساسية بدون تفكير

🚩مضادات الهيستامين زي زيرتك وتيلفاست وايفاستين هي العلاج الأمثل سواء للجلد او للعين او الانف

🚩 بخاخة الأنف زي رينوكورت ٣٢ من سن سنه ..أمان جداً والله والواد مش هياخد عليها 😔

🚩 بالنسبة للعين بنلتزم بالقطرات اللي بتحتوي علي مضاد للحساسية مع كمادات مياه بارده والبعد عن الاتربه تماماً

🚩بالنسبة للجلد بنلتزم بالغسيل بصابون #جليسرين واستخدام المرطبات وعلاج الالتهاب بالهيدروكورتيزون ودا اخف درجة فيهم،، مع لبس الملابس القطنية ونهوي البيت كويس

🚩لازم تعرفوا ان علاج الحساسيه زي نظارة النظر كدا ..اللي بيعاني منها ميقدرش يستغني عنها ومن غيرها هيخبط في شجرة والله ..
يعني العلاج بياخد وقت وبيطول حتي بعد التحسن كنوع من الوقايه من شهر ل ٣ شهور

🚩ولازم نعرف ان الحساسيه رد فعل ..بمعني لازم نمنع اي trigger factor عامل محفز
زي ..كل ما يُستنشق من برفيوم -بخور-أتربة-دخان -سجاير
وحالياً البعد عن مكان استنشاق الزهور والالتزام بغذاء صحي من خضروات وفواكه وبالاخص اللي فيها فيتامين C
زي البرتقال والليمون والجوافه واليوسفي

🚩وفي الفترات الوقائية بنمشي الطفل علي مونتليكاست زي سينجيولاير او ليليبل لمدة ٣ شهور وحالياً حتي منتصف شهر ابريل

#بخاختك في مناخيرك وزيرتكك في بقك وسينجيولايرك ع ملعقة زبادي وشكرا 👍

٤- الالتهاب الكبدي أ
•••••••••••••••••••
🚩منتشر حالياً،، بيجي الطفل في الأول بأعراض جهاز هضمي (مغص او ترجيع او اسهال او التلاته مجتمعين ) وحراره

🚩مش بنشك فيه غير بتغير لون العين للإصفرار وتحول لون البول لغامق زي الشاي كدا
بنعمل تحليل HAV igM
طلع ايجابي يبقي التهاب كبدي أ ع طوووول،، لازم التحليل لاستبعاد باقي اسباب زيادة الصفرا 👌

🚩علاجه الراحه مع السوايل والسكريات وممكن ندي منشط للكبد مع فيتامين ب مركب (مدارس)
وبياخد من ١٠-١٥ يوم

🚩والتحسن بيبدا بتحسن الشهيه للطفل ولون البول يرجع للطبيعي ولون العين كذلك

🚩آه معدي طبعا وبنبعد الطفل عن الحضانه او المدرسه تماما،، وفي البيت بنخصص للطفل أدواته من طبق وملعقه وفوطه وبنقص ظوافره وبنحافظ ديما مكان الحمام بالديتول لانه مكان العدوي الاساسي

🚩بيجي مره في العمر او بناخد تطعيم ليه وخلاص بس للاسف ناقص حالياً وان شاء الله يتوفر قريب #طعموا_ولادكم_وريحوا_بالكم

٥-الجديري المائي
••••••••••••••••••
🚩طبعا لا يخفي عليكم
بياخد كل اشكال الحبوب اللي في الدنيا
بيبدأ بحبوب حمرا وبعد كدا تملي مياه وبعد كده تتحول لقشرة سودا

🚩بيظهر في الظهر والبطن وبعد كدا ينتشر للأطراف
🚩اهم حاجه الطفل ما يهرش ،،بنقص ظوافره وندهن ع جسمه لوسيون مع مضاد للحساسيه بالفم،، زوفيراكس بيعجل في الشفاء لو اتاخد من اول يوم ،، لكن الدور دا بياخد دورته كامله يعني هياخدها 😢

🚩موضوع اننا مش ان الطفل مش بياخد شور دا نفسي اعرف مين اللي قاله وانتشر عبر الاجيال😡،، بندي شور عادي بس نخلي المياه تنزل انسيابيه ع جسمه بدون دعك ،، العدوي بتنتشر من المياه اللي جوا الحبوب لو فرقعت من الاحتكاك ،، ونغير هدومه يوميا

🚩ايوا معدي جدا ..فالعزل مطلوب حتي ظهور القشرة السودا..وبيجي مره في العمر

🚩ليه تطعيم بيحمي بنسبة ٨٥ ٪‏ ،، ولو ابنك اخد التطعيم وجاله بيجي خفيف جدا



دكتور إيهاب الإمام طب الأطفال

رسالة ورؤية موقع الصحة والجمال والأزياء

الصحة والجمال والأزياء يحتوى على كثير من المقالات والدروس في عدة مجالات كالعمل الحر والربح من الانترنت والمجالات التعليمية والصحية والرياضية وكذلك مجال شروحات البرمجة والكثير من التصنيفات المختلفة والتي تُغني من يريد انشاء موقع نموذجى رائد عن طرح الاستفسارات والاسئلة التي تتعلق بعالم الإنترنت.

كما يتميزالصحة والجمال والأزياء أن له فريقً مهمته هي مراجعة كل المقالات المطروحة عليه ولا يتم نشر أي مقال في حالة كان مكررًا أو عديم الفائدة؛ لذلك أي مقال سوف تجده على موقع بوابات كوم سيقدم لك معلومات هامة كتبها مطورون بارعون في أعمالهم، وراجعها ورائهم فريقًا مميزا متخصصا.

انشرها في فيسبوك غردها في تويتر انشرها في جوجل + ارسلها في واتساب