نصائح مع الدكتور أحمد الخطيب للأطفال
نصائح مع الدكتور أحمد الخطيب
--وهييجي منين الخير والشتا لسه مدخلش وعيالي عندهم برد مش سايب جتّتهم 😤 لسه ياخويا اما المدارس تبدأ .. انتا متعرفش الحوسه اللي انا فيها 😏
إقرأ أيضا
لا حوسه ولا كوسه ، انتي هتعملي الحاجات دي بالترتيب أول ما ابنك يرجع من المدرسه مناخيره "مسدوده او بترشح"... :
هتجيبي شفاط أنف أطفال (الصوره والڤيديو اول كومنت) أو سرنجه ٥ سم وتمليها مياه نضيفه او محلول ملح ،، ولازم حتماً تسلكي الأنف كوي...
-- لا حملك عليا .. انا ابني موستاحييييل يرضى اسلك مناخيره ابداً ده بيلم عليا الجيران و بتقلب حلبة مصارعة والله 😰 بقولك ،، ينفع احط اوتريفين وخلاص؟
لأ
--طب بخاخة الكورتيزون دي ؟؟
الص
برضه لأ !انتا هتفاصلي يا مدام !! حضرتك فاهمه غلط خالص خلاص يبقي موستاحييل تنفعك باقي النصايح ، شوفي يا مدام ، "الأنف " دي مصدر الشرور ، بينزل المخاط منها علي الحلق يعمل احتقان ، ع الصدر يعمل كحة ، يقفل قناة الأذن الوسطي يعمل مياه ورا الطبلة ، يقفل الجيوب الأنفية يعمل التهاب ،، يعني كلمة السر "تسليك الأنف "... ولازم يتعمل صح والله !
-- خلاص فهمت بس الرشح بيطول معايا دايماً مفيش حاجة ليه ؟؟
انا عارف انك بتجيبي من نفسك تلفاست وزرتك وكلاريتين بس خدي بالك ،، استخدامهم بشكل مستمر من غير اشراف طبيب بيعمل حاجتين ، كحة ناشفة جدا (عشان بينشفوا البلغم) ،، ولو فيه مياه ورا الطبلة مش بتصرف بسرعه ، فهمتي ليه استخدامهم ميطولش الا في حالات حساسية الانف وتحت اشراف طبيب ؟؟؟
-- طب والكحة ، الكحة اللي مش بتنيمني دي 😥
ببساطه عالجي السبب ، تعالجي الكحة ، عارفه ، كل الأبحاث بتأكد ان ٨٨٪ او اكتر من حالات الحساسية الصدرية معاها او سببها حساسية انف ، فنقفل الحنفية ..💧💧
-- الحوض يسلك 👍 تمام بس برضه عاوزه حاجة للكحة 😘
السوايل الدافيه ، ثم السوايل الدافية وكمان السوايل الدافية ، ولو رافض يشرب يبقي ادوية اعشاب مهدئات السعال ماليه السوق .. كل اما نبقي قريبين من الطبيعي يبقي احسن .
الصحة
-- طيب مش يمكن اللي عنده دي حساسية 👀🤔
ماهو انتي كأم لازم تشكي في حساسية الأنف لو فيه رشح مستمر ، حكة ، هرش ، عطس ، وتكرار الادوار دي ، مع المواسم و الفصول ، او طول السنة ،،
وكمان حساسية الصدر لازم معاها الثلاثي الأشهر ، تكرار التعب ،
التحسن على موسعات الشعب ،
وقريب من ناحية الأم أو الأب ،،
ايه الباليه اللي انا بلعبه ده 😜
-- انتا هتهزر يا دكتور 😡 قولّي بأه يعني ساعتها العلاج بيختلف عن البرد العادي !
البروتوكول بيختلف تماماً ، علاجنا بخاخات الانف والصدر بالأساس ،، مننساش بأه أسباب الكحة التانية زي الارتجاع في الاطفال حديثي الولادة ، وأمراض الصدر المولودين بيها ، ومشاكل القلب ، والأمراض "المجعلصة" اللي بنسمع عنها كل فين وفين ومن رحمة ربنا انها نادره !
--طيب بص بقا يا راجل انتا انا جبت آخري معاك ياباااااي ده انتا رغاي بشكل 😤 انجز بقا ياخويا وقولي برضه احمي عيالي ازاي في المدرسة !
خدي مني ال ٧ نصايح دي وادعيلي :
1. ابدأي بثمرة فاكهة صباحاً ومساءاً خاصة الموز والتفاح والبرتقال ، ڤيدروب قطارة يومياً لمدة شهر ،، مصل الانفلونزا ( كل الاطفال فوق ٦ شهور حساسية البيض يمتنعون) بيقلل الاصابه بالانفلونزا من ٥٠-٦٠٪ حسب احدث دراسه امريكية.
2. مفيش هزار ، الوقاية خيرٌ من العلاج ، ابنك لو بيكحّ بشكل متكرر ، او عنده برد ، لازم يغيب عشان ميعديش غيره ، المدرسين لازم يفصلوا الأطفال اللي بتكحّ عن أصحابهم ويتصلوا بالأهل ياخدوهم ، لو مفيش حلّ بنلجأ للmask القناع ونعلم ابننا يلبسوا لو فيه طفل بيكحّ وأمرنا لله!
3. الحقي برد ابنك بسرعه !
اول ما يرجعلك "مخنفر وبيرشح " >>تسليك انف
بيكحّ >>سوايل دافيه او اعشاب فوراً
كحة غليظة او صوتها غريب>> كشف فوراً
حرارة فوق ٣٨،٥ متكرره او مستمره >> كشف فوراً
ترجيع بلغم متكرر>>ابرة ترجيع و كشف فوراً
4. نبهي علي ابنك يبعد عن الطفل اللي بيكح ، ولما هوا يكحّ أو يعطس علميه يغطي وشّه بإيده أو بمنديل ، ويغسل ايده فوراً ، متستهونيش والله بالحاجات البسيطة دي هتحميه احسن من كوول اللي فات !
5. في حالة انتشار الهربس أو الجديري المائي لا قدر الله - وده عامل إقامة دايمه في مدارسنا على فكرة 😏- لازم ابنك يغيب من ٧-١٤ يوم مفيش كلام ، وتنبهي عليه ميستعملش ادوات اصحابه اطلاقاً ، ولا مناديل ، ولا اكواب ، ولا ياكل وراه ، ولا من اكله ،، هتفرق معاه جداً في تقليل العدوى!
6. الاطفال اللي بيجيلهم التهابات بكتيرية متكرره ، برونكوڤاكسوم رائع ، كيس صباحا على اول لقمة ، ١٠ ايام من كل شهر ، لمدة ٣ شهور متتاليه.
7. ابنك لو بيكح صيف شتا او بشكل متكرر ، ومعاه إكزيما (خشونة جلد أو هرش) مزمنة ، أو إمساك مزمن ، إسهال مزمن ، ألم بطن متكرر أو مزمن ، أو لو الكحة بدأت معاه من الولادة ، لازم تفكري وتلفتي نظر دكتورك لحساسية الطعام ، يمكن يكون سبب كوول ده اكل معين !
سيبك من كل ده ، نهدا كده ، ونستعين بالله ، ونتوكل عليه ،، ونتعامل بهدووء ، لسه الشتا طوييل ، ومحتاج نفس طويل ، و أم صبوره ، وفاهمه ، ومثقفه ، وواعيه ..
صدقوني والله ...
أحسن أم .. هيا اللي بتوقن تماماً ان كل شئ بقدر الله ، فلما ابنها بيتعب او بتصيبها أى مشكلة ، بتهدا فبتعرف تحلها ،، و تعدي علي خير ..
د.أحمد الخطيب.
رسالة ورؤية موقع الصحة والجمال والأزياء
الصحة والجمال والأزياء يحتوى على كثير من المقالات والدروس في عدة مجالات كالعمل الحر والربح من الانترنت والمجالات التعليمية والصحية والرياضية وكذلك مجال شروحات البرمجة والكثير من التصنيفات المختلفة والتي تُغني من يريد انشاء موقع نموذجى رائد عن طرح الاستفسارات والاسئلة التي تتعلق بعالم الإنترنت.
كما يتميزالصحة والجمال والأزياء أن له فريقً مهمته هي مراجعة كل المقالات المطروحة عليه ولا يتم نشر أي مقال في حالة كان مكررًا أو عديم الفائدة؛ لذلك أي مقال سوف تجده على موقع بوابات كوم سيقدم لك معلومات هامة كتبها مطورون بارعون في أعمالهم، وراجعها ورائهم فريقًا مميزا متخصصا.
تعليقات : 0