١٠ علامات تخليكوا تشكّوا إن ده مش برد دي حساسية
1. لما البرد يتكرر كتير ، وابنك يطلع من دور يدخل في دور .
2. رشح ، عطس ، حكة في الأنف أو العين مع هرش ، زكام ، خنفره (صوت شخير) ، الشعور ببلغم مستمر في الحلق دي سبع أعراض لو بتتكرر ، نفكر في حساسية أنف بدون أى نقاش !
إقرأ أيضا
3. لما الكحة تكون بالليل دايماً ، أو بتزيد بالليل ، وساعات يصحى يكح لغاية ما يرجّع . وبالنهار زي الفلّ . تكرار "نمط الكحة" ده يخلينا نفكر في افرازات خلف-أنفية بتنزل بالليل مع الوضع الأفقى وميتحسنش غير اما يتعدل أو ينام على مخده عالية!
4. الكحة اللي معاها صفير (تزييق) ،، وبتتحسن مع موسعات الشُّعَب ( جلسات بخار او ادوية او بخاخات)،، وبتتكرر ٤ مرات في السنة ،، ولما يجري ويلعب ينهج أو يكح ،، خللي بالك ،، كده داخلين على حساسية صدر يا معلم ..
5. الكحة اللي دايماً ولا بد وأبداً تبدأ بالأنف وتنزل عالصدر بتبقى حساسية أنف بالأساس ،، ومينفعش اقعد اسلك الحوض (الصدر) بموسعات شعب ، واسيب الحنفية (الأنف ) بتنقط !! لازم الاتنين يتعالجوا سوا 👍
6. نقطة فنية جداً .. ساعات كتير أمهات يشتكو من التهاب حلق متكرر ، ويكون السبب حساسية أنف "داخلية"! يعني إيه ؟ يعني بتسألى نفسك سؤال واحد ،، هل ابنك مع الالتهاب ده أنفه مقفولة أو سايله أو بيخنفر دايماً ؟ لو الإجابة آه ، دي الحنفية حضرتك مفتوحة عالماسورة (الحلق) .. اقفلي الحنفية لو سمحتي
7. نقطة فنية جداً جداً ... لو عرفنا مسببات الحساسية نقدر نقضي على ٩٠٪ منها ،، يعني خليكي أم ناصحة ،، ابنك لو كل ما ياكل اكل معين بيكح ( لبن شوكولاته بيض قمح صويا مكسرات مثلاً ) يبقى دي حساسية طعام ومن أعراضها البرد والكحة وموجوده والله وبنشوفها كتيييير ..
8.لو ابنك او بنتك اللي معاه برد او كحة دايما معاه انتفاخ وألم بطن متكرر أو إمساك مزمن أو إسهال متكرر أو محدش عارفله حمام طول عمره إمساك يا إسهال يا مخاط في البراز متنسيييييش تعرفي الدكتور المعلومة دي عشان مهمة جداً في تشخيص حساسيات الطعام اللي بتسبب كحة أو أمراض زي السيلياك و أمراض البنكرياس أو نقص المناعة .. مين عارف 🤔
9. القطط الكلاب حبوب اللقاح حشرة الفراش العفن والفطريات والرطوبة الصراصير دي أهم وأشهر مسببات الحساسية من المشمومات . تابعي ابنك وشوفي !
10. خشونة الجلد أو الإكزيما المتكررة أو المزمنة ليها علاقة وثيقة بحساسية الأنف والصدر ،، ما كلها حساسية يا جماعة ، واللي عمل دي يعمل دوكها فنخلي بالنا كويس واحتمال الدكتور يطلب تحليل يريحك من السبب ..👍
تلك عشرةٌ كاملة
رسالة ورؤية موقع الصحة والجمال والأزياء
الصحة والجمال والأزياء يحتوى على كثير من المقالات والدروس في عدة مجالات كالعمل الحر والربح من الانترنت والمجالات التعليمية والصحية والرياضية وكذلك مجال شروحات البرمجة والكثير من التصنيفات المختلفة والتي تُغني من يريد انشاء موقع نموذجى رائد عن طرح الاستفسارات والاسئلة التي تتعلق بعالم الإنترنت.
كما يتميزالصحة والجمال والأزياء أن له فريقً مهمته هي مراجعة كل المقالات المطروحة عليه ولا يتم نشر أي مقال في حالة كان مكررًا أو عديم الفائدة؛ لذلك أي مقال سوف تجده على موقع بوابات كوم سيقدم لك معلومات هامة كتبها مطورون بارعون في أعمالهم، وراجعها ورائهم فريقًا مميزا متخصصا.
تعليقات : 0