الرضاعة والصيام د . إيهاب الإمام طب الأطفال

#بدايةً..!!

ومن منظور طبي مُقْترن برؤية دينية وبإختصار 👌

**فيه عوامل بيتحدد من خلالها ,, نصوم ولا لأ ؟؟

☝️حالة الأم الصحية

يعني لو أم تعبانه او بتعاني من مرض زي الضغط او السكر أو سنها كبير #تختلف عن أم صحتها كويسه

☝حالة الطفل الرضيع الصحية

طفل كويس ووزنه بيزيد بمعدل طبيعى ومفيش عنده مشكله  #يختلف عن طفل تعبان او وزنه ضعيف وبنحاول نزوده بكل الطرق

☝عمر الطفل الرضيع

قبل سن ٦ شهور ,, ودا بيكون اساس غذائه وحياته من الرضاعه بس ,, ((والسن دا محل الخلاف ))

#يختلف عن سن فوق  ٦ شهور لسنه ..ودا بيكون بدأ في ادخال اكل بجانب الرضاعة #يختلف عن سن فوق السنه اللي بيكون الاكل اصبح مصدر رئيسي

☝وقت الصيام كمده؟ وف اي فصل؟

فيه دراسه بتتكلم عن ان الصيام لمدة اكتر من ١٥ ساعه 🕔 ولايام متتاليه بتصيب الام بالارهاق وبالتالي بتأثر علي كمية اللبن

فالصيام لفترات طويله وفي عز الحر #يختلف عن الصيام لفترات قليله ويكون في الشتا

☝الرأي الطبي!!

ودا بيكون من ناحية الام لحالتها الصحيه (دكاترة النسا) ومن ناحية الطفل معدل زيادته وحالته الصحيه ( دكاترة الاطفال)

يعني فيه عوامل من البداية بتقضي بالإفطار أمراً وليس فضلاً..وفيه عوامل بتكون الأمور فيها مُختَلف عليها ,,زى ما هنشرح ☑️

طيب .

#خلاص_هتصومى ؟؟

لازم تعرفي ان الصيام تأثيره علي اللبن مُتمثل فى انخفاض الزنك والماغنيسيوم والبوتاسيوم,,ومعظم الدراسات بتأكد علي ان معدل اكتساب الوزن للأطفال في الصيام بيقل نسبياً

ولكن فيه خطوات معينه ممكن الأم تنفذها ودا بيزود من  فرصه الحفاظ علي اللبن :

***********  *********** ***********

١- تشرب مياه ولبن وسوايل كتيربشكل عام

٢-بلاش اي حاجه فيها كافيين او سكريات زياده ..بتعطش وبتقلل السوايل في الجسم

٣-بلاش ملح وبهارات زياده علي الاكل..وابعدي عن المخللات..واياكي والجبنه الرومي ع السحور ..هتنشفك من السوايل بسبب الاملاح اللي فيها

٤- بلاش حلويات سكرها كتير ,, خليكي في الفواكه زي البطيخ🍉 والعنب🍇 ,, والخضروات زي الخيار والجرجير..

٥-بلاش تتعرضي للشمس كتير..تكييف او مروحه وعيشي💯

٦-زبادى ع السحور ولبن بتمر ع الفطار ..تحفه

٧- خدي فيتامينات علشان تعوضي فقدانها ومفيش مانع من مدرات اللبن زي هيربانا ودا بعد استشارة طبيبك

٨- ممكن تشفطي اللبن وتخزنيه لو تقدري..ولو بترضعي الاتنين طبيعي وصناعي قسميهم علي مدار اليوم ..مره طبيعي ومره صناعي 🍼

٩- كل الاعمال اللي بتحتاج مجهود من تسوق وتنظيف ...خليها وانتي فاطره

**عملتي كل ده خلاص وهتصومي وترضعي ؟؟

فيه علامات خطر 🚫

لو لقتيها عليكي او علي ابنك ..لاااازم تفطري ..ولو اصريتي وكملتي صيام مع وجودها تتحملي ذنب 😡

📍علامات الام:

*************

١- عطش شديد

٢-صداع شديد

٣-احساس بالدوخه او الاغماء او تعب شديد

٤- لون البول اتغير للون داكن وريحته نفاذه

📍علامات الطفل الرضيع :

*********************

١- الطفل بيبكي اكتر من المعتاد

٢- قلة البول ولونه اغمق

٣- بيمص في صباعه كتيير

٤- ارهاق زياده وبيظهر في عدم قدرته علي المص

٥- مدروخ وبينام زياده عن اللازم

٦-حرارته مرتفعه بدون سبب مرضي

٧- بالمتابعه مع الطبيب زيادته في الوزن قلت

كده بقا لاااازم تفطري ... لان الوضع اصبح متعلق بحياة طفل ... واوعي تفكري ان الفطام حل ,,لا,, طفلك محتاجك ودا شئ ثوابه عند ربنا كبير زي الصيام وأكتر ✔️

#خلاص_هتفطرى... طب افتكري 🙏

ان النبي صلي الله عليه وسلم رخّص للمرضع ان تفطر في أيام رمضان خوفاً علي إبنها.. وذلك ان دل فإنما يدل علي أهمية لبن الأم وفائدته العظمي للطفل...فرضاعتك لطفلك عباده وربنا ارحم بينا من نفسنا..متزعليش 💝

(إِنَّ اللَّهَ يُحِبُّ أَنْ تُؤْتَى رُخَصُهُ كَمَا يُحِبُّ أَنْ تُؤْتَى عَزَائِمُهُ)

#في_النهاية ‼️

كل أم تطبق اللي ذكرناه علي نفسها وتشوف هتقدر تصوم من الأول ولا لأ طبقاً لصحتها وصحة ابنها (وعمره) وفترة الصيام كعدد ساعات والجو من حيث الحر وشدته...ودا بالمتابعه مع الدكتور بتاعها👍

ولو مش قادرة تطبق من الاول تصوم يوم او اتنين وتقرر من حيث ظهور علامات الخطر اللي ذكرتها ليها ولابنها 👌

د.إيهاب الإمام